جہلم: قیمت پنجاب ایپ میں چینی، آٹا، دال مسور ، دال ماش ،سفید چنے موٹے، بناسپتی گھی، نان سمیت سرخ مرچ و دیگر اشیاء خوردونوش کے نرخ درج نہیں کئے گئے ۔ کریانہ مرچنٹس ،دکاندار و نان بائیوں نے من مانے نرخوں پر نان و اشیاء ضروریہ کی فروخت شروع کررکھی ہے ۔
تفصیلات کے مطابق قیمت پنجاب ایپ پر چینی، آٹا، دال مسور ، دال ماش ،سفید چنے موٹے، بناسپتی گھی، نان سمیت سرخ مرچ و دیگر اشیاء خوردونوش کی قیمتیں درج نہیں کیں جس کیوجہ سے دکانداروں نے من مرضی کے نرخوں پر اشیاء خوردونوش سمیت نان کی فروخت شروع کررکھی ہے جبکہ ڈپٹی کمشنر، ایڈیشنل ڈپٹی کمشنر اور پرائس کنٹرول مجسٹریٹس نے اس حوالے سے مکمل خاموشی اختیار کررکھی ہے۔
شہریوں کا اس حوالے سے کہنا ہے کہ یوں لگتا ہے کہ ضلعی انتظامیہ و پرائس کنٹرول مجسٹریٹس نے جان بوجھ کر موجودہ حکومت کو بدنام کرنے کے لئے گراں فروشوں کو کھلی چھوٹ دے رکھی ہے ۔ جس کیوجہ سے مذکورہ اشیاء کی قیمتیں مختص کرنے سے انتظامیہ گریزاں ہیں۔
شہریوں کا مزید کہنا ہے کہ قیمت پنجاب ایپ پر ضلعی انتظامیہ کی جانب سے اشیاء ضروریہ کے نرخ درج نہ کرنے کیوجہ سے گراں فروش مافیا نے ضلع بھر میں جنگل کا قانون نافذ کرکے غریب سفید پوش افراد کی جیبوں پر ڈاکے ڈالنے شروع کررکھے ہیں۔
جہلم شہر کی سماجی رفاعی، فلاحی و شہری تنظیموں کے عمائدین نے وزیراعلیٰ پنجاب مریم نواز شریف، چیف سیکرٹری پنجاب چوہدری زاہد اختر زمان سے مطالبہ کیاہے کہ قیمت ایپ پنجاب میں مذکورہ اشیاء خوردونوش کے نرخ درج کئے جائیں اور دکانداروں کو مقررہ نرخوں پر معیاری اشیاء خوردونوش فروخت کرنے کا پابند بنایا جائے تاکہ گراں فروشی کا خاتمہ ممکن ہو سکے۔
