سوہاوہ: تھانہ سوہاوہ پولیس نے اہم کارروائی کرتے ہوئے ایمرجنسی 15 پر ڈکیتی کی جھوٹی اطلاع دینے والے کالر کو گرفتار کر کے اس کے خلاف مقدمہ درج کر لیا۔
تفصیلات کے مطابق جہلم کی تحصیل سوہاوہ میں ایس ایچ او تھانہ سوہاوہ نے اپنی ٹیم کے ہمراہ فوری کارروائی کرتے ہوئے ریسکیو 15 پر جھوٹی کال کرنے والے ملزم کو ٹریس کر کے گرفتار کیا اور اس کے خلاف قانونی کارروائی کا آغاز کر دیا گیا ہے۔
پولیس حکام کے مطابق ایمرجنسی سروسز پر جھوٹی اطلاع دینا قانوناً جرم ہے کیونکہ اس سے نہ صرف سرکاری وسائل ضائع ہوتے ہیں بلکہ حقیقی ہنگامی صورتحال میں مدد کے منتظر افراد بھی متاثر ہو سکتے ہیں۔
ڈی پی او جہلم شفیق احمد چوہدری نے کہا ہے کہ ایسے عناصر کے خلاف سخت قانونی کارروائی عمل میں لائی جائے گی۔ انہوں نے شہریوں سے اپیل کی کہ ایمرجنسی 15 کو صرف حقیقی اور ہنگامی صورتحال میں استعمال کیا جائے تاکہ ضرورت مند افراد کو بروقت مدد فراہم کی جا سکے۔
