جہلم: مہنگائی نے جہاں عام شہریوں کی مشکلات میں اضافہ کر دیا ہے، وہیں سبزی اور پھل فروخت کرنے والے دکاندار بھی دوہری مشکلات کا شکار ہیں۔ دکانداروں کا کہنا ہے کہ انہیں سبزی منڈی میں بولی کے دوران سبزیاں اور پھل مہنگے داموں خریدنا پڑتے ہیں جبکہ مارکیٹ کمیٹی کی جانب سے نسبتاً کم قیمتوں پر نرخنامہ جاری کر دیا جاتا ہے، جس کے باعث انہیں مالی نقصان کا سامنا کرنا پڑتا ہے۔
دکانداروں کے مطابق منڈی سے مہنگے داموں سبزیاں اور پھل خریدنے کے باوجود انہیں مارکیٹ کمیٹی کے مقرر کردہ نرخوں سے زائد قیمت پر فروخت کرنے کی اجازت نہیں دی جاتی۔ ان کا کہنا ہے کہ ایک طرف منڈی میں مہنگی خریداری، دکان کے اخراجات اور بچوں کا پیٹ پالنے کی ذمہ داری ہے، جبکہ دوسری جانب کم مقررہ نرخوں پر اشیاء فروخت کرنے کی پابندی کے باعث کاروبار چلانا مشکل ہو گیا ہے۔
سبزی و فروٹ فروش دکانداروں نے انتظامیہ سے مطالبہ کیا ہے کہ متعلقہ افسران اپنی موجودگی میں سبزی منڈی میں بولی کے عمل کی نگرانی کریں اور خریداری کے اصل نرخوں کو مدنظر رکھتے ہوئے نرخنامے تیار کیے جائیں تاکہ دکانداروں کو مناسب قیمت پر اشیاء فروخت کرنے کا موقع مل سکے اور صارفین کو بھی غیر ضروری مہنگائی سے بچایا جا سکے۔
