جہلم: ڈی پی او جہلم طارق عزیز سندھو کی ہدایت پر ڈی پی او آفس جہلم میں اردل روم کا انعقاد کیا گیا۔
اردل روم میں پیش ہونے والے افسران و اہلکاران کے موقف کو تفصیل سے سنا گیا اور میرٹ کے مطابق احکامات جاری کیے گئے۔ اردل روم میں ضلع بھر کے 32 پولیس افسران و اہلکاران نے شرکت کی، جن میں سے 16 پولیس افسران نے بذریعہ وڈیو لنک بھی شرکت کی۔
ڈی پی او جہلم نے شوکاز نوٹسز کے فیصلے سناتے ہوئے متعدد پولیس افسران و اہلکاران کو فرائض میں غفلت برتنے پر سروس ضبطگی، تنخواہ میں کٹوتی اور وارننگ کی سزائیں سنائیں، جبکہ دو پولیس افسران کو مسلسل غیر حاضری پر ڈسمس فرام سروس کردیا گیا۔
اردل روم میں شریک افسران اور اہلکاران کو ہدایت کی گئی کہ وہ اپنے فرائض کو احسن طریقے سے انجام دیں اور پیشہ وارانہ امور کی ادائیگی ایمانداری، دیانتداری اور فرض شناسی کے ساتھ کریں۔
ڈی پی او جہلم طارق عزیز سندھو نے واضح کیا کہ بہترین نظم و ضبط اور اعلیٰ معیار کی تربیت ہی ایک اچھے پولیس افسر کی ضمانت ہے اور محکمہ میں نااہل، کام چور اور بددیانت اہلکاروں کی کوئی گنجائش نہیں۔
اردل روم کے دوران پولیس فورس کو معاشرتی امن و امان کے قیام اور جرائم کے انسداد میں فعال کردار ادا کرنے کی اہمیت پر بھی زور دیا گیا تاکہ عوام الناس کو بروقت اور مؤثر خدمات فراہم کی جا سکیں۔
