سوہاوہ کے علاقے ڈومیلی میں پولیس کا پیشہ ور بھکاریوں کے خلاف بھرپور کریک ڈاؤن، دو بھکارنوں کو گرفتار کر لیا گیا۔
تفصیلات کے مطابق ڈسٹرکٹ پولیس آفیسر جہلم طارق عزیز سندھو کی خصوصی ہدایت پر ضلع بھر میں پیشہ ور بھکاریوں کے خلاف بھرپور کریک ڈاؤن جاری ہے۔ اسی سلسلے میں جہلم کی تحصیل سوہاوہ میں تھانہ ڈومیلی پولیس نے کارروائی کرتے ہوئے دو پیشہ ور بھکارنوں ملزمان کو گرفتار کر لیا ہے جبکہ گرفتار بھکارنوں کے خلاف مقدمات درج کر لیے گئے ہیں۔
پولیس کے مطابق پیشہ ور بھکاری مختلف شاہراہوں، چوکوں اور چوراہوں پر کھڑے ہو کر نہ صرف ٹریفک کی روانی کو شدید متاثر کرتے ہیں بلکہ یہ عمل حادثات کا سبب بھی بنتا ہے، جس سے شہریوں کی جان و مال کو خطرات لاحق ہو جاتے ہیں۔
ڈی پی او جہلم طارق عزیز سندھو نے کہا ہے کہ پیشہ ور بھکاریوں کے خلاف بلاامتیاز کارروائیاں جاری رہیں گی اور اس ناسور کے خاتمے کے لیے تمام دستیاب وسائل بروئے کار لائے جا رہے ہیں۔ انہوں نے واضح کیا کہ شہریوں کے تحفظ اور ٹریفک کی روانی کو برقرار رکھنا پولیس کی اولین ترجیح ہے۔
