جہلم شہر اور گردونواح میں عیدالفطر سے ایک روز قبل ہی شہریوں کو اے ٹی ایم مشینوں سے رقم نکلوانے میں شدید مشکلات کا سامنا کرنا پڑا جبکہ بینکوں کا عملہ عید کی چھٹیوں پر روانہ ہو چکا ہے۔ لنک ڈاؤن ہونے اور اے ٹی ایم میں نقدی ختم ہونے کی وجہ سے شہریوں کو مالی لین دین میں دشواریوں کا سامنا کرنا پڑا۔
تفصیلات کے مطابق جہلم میں بینکوں کے لنک ڈاؤن ہونے اور اے ٹی ایم مشینوں میں نقدی ختم ہونے کے باعث عوام شدید پریشانی میں مبتلا ہو گئے۔ عید کی خریداری اور گھریلو اخراجات کے لیے بڑی تعداد میں شہریوں نے رقم نکلوانے کی کوشش کی، لیکن اکثر اے ٹی ایم مشینیں خالی ہونے کی وجہ سے ناکام رہے۔
شہریوں، سرکاری ملازمین اور عام صارفین کو نقدی کی تلاش میں ایک اے ٹی ایم سے دوسری اے ٹی ایم کے چکر لگانے پڑے، مگر بیشتر مشینیں خالی ہونے کی وجہ سے انہیں مایوسی کا سامنا کرنا پڑ رہا ہے۔
ذرائع کے مطابق گزشتہ روز ہفتہ ہونے کے باعث بینکوں میں پبلک ڈیلنگ بند تھی جبکہ رواں ماہ کے آخری ہفتے میں سرکاری محکموں نے اپنے ملازمین کو قبل از وقت تنخواہیں جاری کر دی تھیں۔ اس وجہ سے بڑی تعداد میں لوگوں نے اے ٹی ایم سے رقم نکلوائی، جس کے نتیجے میں مشینیں خالی ہو گئیں۔ مزید برآں بعض مقامات پر بینکوں کے آن لائن سسٹم میں خرابی کے باعث بھی شہریوں کو دشواری کا سامنا کرنا پڑا۔
شہریوں نے گورنر اسٹیٹ بینک آف پاکستان سے مطالبہ کیا ہے کہ سرکاری و نجی بینکوں کے ذمہ داران کو ہدایت دی جائے کہ وہ عوام کی مشکلات کو مدنظر رکھتے ہوئے اے ٹی ایم مشینوں میں کیش کی دستیابی یقینی بنائیں اور انٹرنیٹ کی خرابی کو دور کریں تاکہ شہری بغیر کسی پریشانی کے اپنی مالی ضروریات پوری کر سکیں۔
