جہلم: ڈپٹی کمشنر جہلم میثم عباس نے کہا ہے کہ تعلیمی اداروں میں بہترین تعلیمی ماحول اور بنیادی سہولیات کی فراہمی کو یقینی بنانے کیلئے تمام ضروری اقدامات اٹھائے جا رہے ہیں تاکہ اداروں کی کارکردگی کو مثالی بنایا جا سکے۔
یہ بات انہوں نے تبلیغ اسلام ہائی سکول اور ایسوسی ایٹ کالج فار ویمن کے دورے کے دوران کہی۔ ڈپٹی کمشنر نے دونوں اداروں میں طلبہ و طالبات اور اساتذہ کی حاضری کو چیک کیا اور تعلیمی شیڈول کا تفصیلی جائزہ لیا۔
انہوں نے مختلف کلاس رومز میں جا کر طلبہ و طالبات سے نصابی سرگرمیوں کے حوالے سے سوالات کئے اور تعلیمی معیار کا جائزہ لیا۔
دورے کے دوران ڈپٹی کمشنر نے صفائی کی صورتحال کا معائنہ کرتے ہوئے ہدایت کی کہ اداروں میں صفائی کے مثالی انتظامات کو یقینی بنایا جائے اور بنیادی سہولیات کی فراہمی میں کسی بھی قسم کی غفلت برداشت نہیں کی جائے گی۔
انہوں نے مزید کہا کہ طلباء و طالبات کی تربیت اور بہترین تعلیمی ماحول فراہم کرنا ضلعی انتظامیہ کی اولین ترجیحات میں شامل ہے اور اس مقصد کے حصول کیلئے ہر ممکن وسائل بروئے کار لائے جارہے ہیں۔
