دینہ: منشیات کیس میں جرم ثابت ہونے پر خاتون منشیات فروش کو 10 سال قید اور جرمانے کی سزا سنا دی گئی۔
تفصیلات کے مطابق عدالت نے منشیات کے سنگین مقدمہ نمبر 819/24 بجرم CNSA 9 (1) 6c تھانہ دینہ کا فیصلہ سناتے ہوئے منشیات فروشی کے جرم میں ملوث مجرمہ سمیرا صبا کو 10 سال قید اور 2 لاکھ روپے جرمانے کی سزا سنائی ہے۔
مجرمہ کو سال 2024 میں منشیات فروشی کے الزام میں گرفتار کیا گیا تھا۔ جہلم پولیس نے جدید ذرائع استعمال کرتے ہوئے مجرمہ کو ٹریس کر کے گرفتار کیا اور تفتیش کے بعد ٹھوس شواہد کے ساتھ چالان عدالت میں پیش کیا۔ مقدمے کی مؤثر پیروی کی گئی، جس کے نتیجے میں عدالت نے جرم ثابت ہونے پر سخت سزا سنائی۔
ڈی پی او جہلم طارق عزیز سندھو نے کہا ہے کہ منشیات فروش معاشرے کا ناسور ہیں، اور ان کے خلاف جہلم پولیس کا بھرپور آپریشن جاری ہے۔ انہوں نے مزید کہا کہ ایسے عناصر کے لیے ضلع جہلم میں کوئی گنجائش نہیں۔
ڈی پی او جہلم نے مقدمے کی مؤثر تفتیش اور قانونی کارروائی پر انویسٹی گیشن و لیگل ٹیموں کی کاوشوں کو سراہتے ہوئے شاباش دی اور تعریفی اسناد و نقد انعام دینے کا اعلان بھی کیا۔
