جہلم: سرکاری و نجی دفاتر، کاروباری مراکز، گھروں اور سیاسی حلقوں میں انتخابات کے نتائج موضوع بحث، انتخابات کے نتائج پر دوستوں اور سیاسی حریفوں سے شرطیں ہارنے والے اس کا ازالہ کر رہے ہیں۔
تفصیلات کے مطابق جہلم سمیت ضلع بھر میں عام انتخابات کے انعقاد کے بعد کاروبار زندگی معمول پر آنا شروع ہو گیا ہے تاہم سیاسی جماعتوں سے وابستگی رکھنے والے ابھی تک ’’الیکشن بخار ‘‘میں مبتلا ہیں۔ سرکاری و نجی دفاتر،کاروباری مراکز، سیاسی حلقوں حتیٰ کہ گھروں میں بھی عام انتخابات کے نتائج موضوع بحث ہیں۔
8 فروری کوضلع بھر میں ہونے والے عام انتخابات میں مسلم لیگ (ن) امیدواروں اور پی ٹی آئی کے حمایت یافتہ آزاد امیدواروں میں ہونے والا مقابلہ موضوع بحث ہے اور مختلف مقامات پر یہ بحث و مباحثہ طوالت اختیار کر گیا۔ سیاسی جماعتوںکے حامی خوشی منانے کے ساتھ ساتھ نتائج پر تحفظات کا اظہار کرتے ہوئے بھی دکھائی دئیے۔
دوسری جانب انتخابات کے نتائج پر دوستوں اور سیاسی حریفوں سے شرطیں ہارنے والے ہوٹلوں اور مٹھائی کی دکانوں پر اس کا ازالہ کرتے رہے۔
