جہلم: ڈپٹی کمشنر میر رضا اوزگن کی ہدایت پر اسسٹنٹ کمشنر جہلم آفتاب اشرف نے تحصیل دفتر اور رجسٹری برانچ کا اچانک دورہ کیا۔
دورے کے دوران انہوں نے عملے کی حاضری، سرکاری ریکارڈ کی دیکھ بھال اور سائلین کو فراہم کی جانے والی سہولیات کا تفصیلی جائزہ لیا۔ مختلف برانچوں کے معائنے کے دوران عملے کو ہدایت کی گئی کہ سرکاری دفاتر میں آنے والے شہریوں کے کام بلا تاخیر مکمل کیے جائیں اور عوامی خدمت کے معیار پر کسی قسم کا سمجھوتہ نہ کیا جائے۔
رجسٹری برانچ کے معائنے میں تمام رجسٹرز اور فائلوں کی جانچ پڑتال کی گئی۔ اسسٹنٹ کمشنر نے واضح کیا کہ رجسٹری کے عمل میں سائلین کو غیر ضروری انتظار کروانا یا رکاوٹیں پیدا کرنا ہرگز برداشت نہیں کیا جائے گا۔ رجسٹری محرر اور متعلقہ عملے کو ہدایت کی گئی کہ ریکارڈ مکمل طور پر منظم اور اپ ڈیٹ رکھا جائے تاکہ شفاف سروس ڈیلیوری یقینی بنائی جا سکے۔
اس موقع پر اسسٹنٹ کمشنر نے تحصیل دفتر میں موجود سائلین سے براہِ راست گفتگو بھی کی اور عملے کے رویے اور کام کی رفتار کے بارے میں دریافت کیا۔ انہوں نے کہا کہ ضلعی انتظامیہ شہریوں کے مسائل کے فوری حل کے لیے تمام سرکاری دفاتر میں بہترین انتظامات کو یقینی بنا رہی ہے۔
غیر حاضر عملے کے خلاف سخت محکمانہ کارروائی کا انتباہ جاری کرتے ہوئے انہوں نے کہا کہ دفتری نظم و ضبط پر کوئی سمجھوتہ نہیں کیا جائے گا اور عوامی خدمت میں کوتاہی برداشت نہیں کی جائے گی۔
