جہلم: محمد کامران کاظمی نے کہا کہ عوامی تعاون کے بغیر کوئی بھی محکمہ اپنے اہداف حاصل نہیں کر سکتا، جنگلات کی حفاظت محکمہ جنگلات کے ساتھ ساتھ لوگوں کی بھی ذمہ داری ہے۔
محکمہ جنگلات کے ڈویژنل آفیسر محمد کامران کاظمی نے میڈیا نمائندگان سے گفتگو کرتے ہوئے کہا کہ جنگلات ہمارا قومی اثاثہ ہے، ان کی حفاظت کے لیے لوگوں میں آگاہی ہونا از حد ضروری ہے۔ ان دنوں پنجاب کے مختلف اضلاع میں جنگلات آگ کی لپیٹ میں آئے ہیں مگر اللہ کے فضل و کرم سے ضلع جہلم بڑی حد تک اس سے محفوظ رہا ہے۔
انہوں نے کہا کہ اس حوالے سے جنگلات کے قرب و جوار میں سگرٹ نوشی کرنا یا کھانے پینے کی چیزیں تیار کرنے کے لیے آگ جلانا کسی بڑے حادثے کا سبب بن سکتا ہے۔ یہ بات وثوق سے کی جا سکتی ہے کہ 60 فیصد آگ لگنے کی وجہ مذکورہ بالا اسباب ہیں۔
محمد کامران کاظمی نے کہا کہ حکومت پنجاب شجرکاری کے حوالے سے بہت زیادہ دلچسپی رکھتی ہے، اگر ہر فرد ایک ایک پودا لگائے تو کروڑوں کی تعداد میں پودے لگانے میں ہم کامیاب ہو جائیں گے۔
محمد کامران کاظمی کا مزید کہنا تھا کہ فارسٹ ڈیپارٹمنٹ کے ملازمین کی تعداد نہ ہونے کے برابر ہے، اس لئے یہ توقع کرنا کہ محکمہ جنگلات کے ملازمین ہی مطلوبہ اہداف حاصل کر لیں گے یہ ناممکن ہے۔ اس میں عوامی تعاون کی اشد ضرورت ہے۔
میڈیا سے وابستہ افراد سے متعلق ان کا کہنا تھا کہ مثبت تنقید سے ہم بہتر سے بہتر اقدامات کرنے میں کامیاب ہو جاتے ہیں۔
