جہلم: ڈپٹی کمشنر جہلم میر رضا اوزگن کی زیر صدارت محکمہ ماحولیات کا ایک اہم اجلاس منعقد ہوا جس میں نئے کرش پلانٹس کی تنصیب کے لیے موصول ہونے والی درخواستوں کی سماعت کی گئی۔
اجلاس کے دوران ڈپٹی کمشنر میر رضا اوزگن نے واضح کیا کہ نئے کرش پلانٹس کی منظوری ماحولیاتی تحفظ کے سخت اقدامات سے مشروط ہوگی اور اس حوالے سے کسی قسم کی کوتاہی برداشت نہیں کی جائے گی۔ انہوں نے ہدایت کی کہ محکمہ ماحولیات کے سرٹیفکیٹس تمام قانونی تقاضوں کو مدنظر رکھتے ہوئے جاری کیے جائیں۔
ڈپٹی کمشنر نے کہا کہ کرش پلانٹس کے قیام سے قدرتی ماحول اور انسانی صحت کو نقصان نہیں پہنچنا چاہیے جبکہ گرد و غبار پر قابو پانے کے لیے جدید سسٹمز کی تنصیب کو لازمی قرار دیا جائے۔ انہوں نے متعلقہ حکام کو ہدایت کی کہ شجرکاری اور آلودگی سے بچاؤ کے اقدامات کو یقینی بنایا جائے تاکہ ترقیاتی سرگرمیوں کے ساتھ ماحولیاتی توازن بھی برقرار رکھا جا سکے۔
اجلاس کے اختتام پر ضوابط پر پورا اترنے والی متعدد درخواستوں کی منظوری دے دی گئی جبکہ دیگر درخواستوں کو ضروری ترامیم اور دوبارہ معائنے کے لیے واپس بھجوا دیا گیا۔ ڈپٹی کمشنر نے واضح کیا کہ عوامی صحت اور ماحولیات کے تحفظ پر کسی قسم کا سمجھوتہ نہیں کیا جائے گا۔
