جہلم: ریسکیو 1122 جہلم کی جانب سے ماہ جون 2025 کی کارکردگی رپورٹ جاری کر دی گئی ہے۔
ریسکیو 1122 جہلم نے ماہ جون کے دوران مختلف نوعیت کی ایمرجنسیز میں فوری اور بروقت کارروائیاں کرتے ہوئے مجموعی طور پر 2480 افراد کو ریسکیو کیا اور ابتدائی طبی امداد فراہم کرنے کے بعد 1584 مریضوں کو مختلف ہسپتالوں میں منتقل کیا گیا۔
ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی زیر صدارت ادارے کی ماہانہ کارکردگی کا جائزہ اجلاس منعقد ہوا، جس میں بتایا گیا کہ ریسکیو کو جون کے مہینے میں مجموعی طور پر 2544 ایمرجنسی کالز موصول ہوئیں۔ ان میں سب سے زیادہ تعداد میڈیکل ایمرجنسیز کی تھی جن کی تعداد 1720 رہی، جبکہ 360 کالز روڈ ٹریفک حادثات، 48 کالز آگ لگنے، 46 کرائم، 7 کالز پانی میں ڈوبنے کے واقعات اور 363 متفرق ایمرجنسیز سے متعلق تھیں۔
رپورٹ کے مطابق ماہ جون میں مختلف ایمرجنسیز کے دوران 102 افراد جان کی بازی ہار گئے، جن میں زیادہ تر اموات میڈیکل ایمرجنسیز کے باعث ہوئیں، جبکہ روڈ ٹریفک حادثات میں 8 افراد جاں بحق ہوئے۔ ریسکیو 1122 جہلم نے ایمرجنسیز پر رسپانس کا اوسط وقت 8.14 منٹ برقرار رکھا، جو کہ کسی بھی ایمرجنسی ادارے کی بہترین کارکردگی کا عکاس ہے۔
ڈسٹرکٹ ایمرجنسی آفیسر نے اجلاس کو بتایا کہ ممکنہ سیلابی صورتحال کے پیش نظر تحصیل پنڈ دادنخان میں دریائے جہلم پر فرضی مشقیں بھی کروائی گئیں تاکہ کسی بھی ناگہانی آفت کی صورت میں فوری ردِ عمل دیا جا سکے۔ اس کے ساتھ ساتھ کمیونٹی سیفٹی پروگرام کے تحت مختلف تعلیمی اداروں اور دفاتر میں آگاہی و تربیتی سیشنز کا انعقاد بھی کیا گیا۔ یونین کونسل سطح پر کمیونٹی ایمرجنسی رسپانس ٹیموں کی تشکیل کا عمل جاری ہے، جبکہ سکاؤٹس کے لیے CADRE ٹریننگ کا بھی اہتمام کیا جا رہا ہے۔
مزید بتایا گیا کہ ریسکیو 1122 جہلم کی "پیشنٹ ٹرانسفر سروس” کے تحت جون کے مہینے میں 78 مریضوں کو بہتر علاج کی سہولت کے لیے راولپنڈی، اسلام آباد اور سرگودھا کے ہسپتالوں میں منتقل کیا گیا۔
اجلاس کے اختتام پر ڈسٹرکٹ ایمرجنسی آفیسر انجینئر سعید احمد نے ریسکیو اہلکاروں کی ماہ جون میں کارکردگی کو سراہتے ہوئے کہا کہ ریسکیو 1122 جہلم کی ٹیم ہمہ وقت الرٹ ہے اور کسی بھی ہنگامی صورتحال سے نمٹنے کے لیے بہترین صلاحیتوں سے لیس ہے۔
انہوں نے کہا کہ ریسکیو اہلکار شہریوں کی جان و مال کے تحفظ کے لیے دن رات خدمات انجام دے رہے ہیں اور اسی جذبے کے ساتھ آئندہ بھی اپنی ذمہ داریاں نبھاتے رہیں گے۔
