جہلم: پنجاب ڈیزاسٹر مینجمنٹ اتھارٹی (پی ڈی ایم اے) نے مون سون کے پانچویں اسپیل کے آج سے شروع ہونے کی پیشگوئی کرتے ہوئے متعلقہ اداروں کو ممکنہ ہنگامی صورتحال کے پیش نظر الرٹ رہنے کی ہدایت کی ہے۔
پی ڈی ایم اے کی جانب سے جاری اعلامیے کے مطابق بارشوں کا نیا سلسلہ پنجاب کے مختلف اضلاع کو متاثر کرے گا، جس کے باعث نشیبی علاقوں میں اربن فلڈنگ، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے۔
محکمہ موسمیات کے مطابق جہلم سمیت پنجاب کے مختلف اضلاع اور علاقوں میں کہیں ہلکی جبکہ کہیں تیز بارش کا امکان ہے، جس سے موسم خوشگوار ہونے اور حبس کی شدت میں کمی آنے کی توقع ہے۔
پی ڈی ایم اے کے مطابق سرگودھا، چنیوٹ، ملتان، فیصل آباد سمیت پنجاب کے متعدد شہروں میں بھی بادل برسنے کا امکان ہے، جبکہ بارش کے باعث درجہ حرارت میں کمی اور گرمی کی شدت میں کمی آنے کی توقع کی جا رہی ہے۔
متعلقہ اداروں کو ہدایت کی گئی ہے کہ ممکنہ بارشوں کے پیش نظر نشیبی علاقوں، ندی نالوں اور دیگر حساس مقامات کی نگرانی یقینی بنائی جائے اور کسی بھی ہنگامی صورتحال سے نمٹنے کے لیے ضروری انتظامات مکمل رکھے جائیں۔
