پنڈدادنخان: حکومت پنجاب کے سیف سٹی منصوبے کے تحت تحصیل پنڈدادنخان کے ساتھ ساتھ للِہ کے علاقے کو بھی جدید سیکیورٹی نظام میں شامل کرنے کے اقدامات تیز کر دیے گئے ہیں۔
ذرائع کے مطابق للِہ میں سیف سٹی منصوبے کے لیے مجوزہ مقامات کا سروے مکمل کر لیا گیا ہے اور جلد ہی کیمروں کی تنصیب کا عملی مرحلہ شروع ہونے کی توقع ہے۔
ذرائع کے مطابق منصوبے کے تحت للِہ کے اہم چوراہوں، مرکزی بازاروں، داخلی و خارجی راستوں اور دیگر حساس مقامات پر جدید سی سی ٹی وی کیمرے نصب کیے جائیں گے۔ ان کیمروں کے ذریعے علاقے میں نقل و حرکت کی مؤثر نگرانی، جرائم کی روک تھام اور مشتبہ سرگرمیوں پر کڑی نظر رکھی جا سکے گی۔
حکام کے مطابق سیف سٹی منصوبے کا بنیادی مقصد امن و امان کی صورتحال کو مزید بہتر بنانا، جرائم کی شرح میں کمی لانا اور قانون نافذ کرنے والے اداروں کو جدید ٹیکنالوجی کی مدد سے موثر معاونت فراہم کرنا ہے۔ منصوبے کے فعال ہونے سے پولیس کو جرائم کی بروقت نشاندہی، تفتیش اور ملزمان کی گرفتاری میں بھی مدد ملے گی۔
ذرائع کا کہنا ہے کہ منصوبے پر عملی کام جلد شروع ہونے کا امکان ہے اور مرحلہ وار بنیادوں پر پورے نظام کو فعال بنایا جائے گا تاکہ شہریوں کو جدید سیکیورٹی سہولیات فراہم کی جا سکیں۔
علاقہ مکینوں نے حکومت پنجاب کے اس اقدام کو خوش آئند قرار دیتے ہوئے کہا ہے کہ سیف سٹی منصوبے کے تحت جدید نگرانی کا نظام قائم ہونے سے نہ صرف جرائم کی روک تھام میں مدد ملے گی بلکہ عوام کے تحفظ اور سیکیورٹی کے احساس میں بھی اضافہ ہوگا۔
شہریوں نے امید ظاہر کی کہ منصوبے کی بروقت تکمیل سے للِہ اور گردونواح کے علاقوں میں امن و امان کی صورتحال مزید بہتر ہوگی اور جدید مانیٹرنگ سسٹم کے ذریعے علاقے کو محفوظ بنانے میں اہم پیش رفت حاصل ہو سکے گی۔
