سوہاوہ: ڈپٹی کمشنر جہلم میر رضا اوزگن کی خصوصی ہدایت پر میونسپل کمیٹی سوہاوہ اور سپورٹس ڈیپارٹمنٹ کے زیرِ اہتمام پہلی مرتبہ “ویمن گیمز سوہاوہ 2026” کا شاندار اور تاریخی انعقاد کیا گیا۔
اس پروقار ایونٹ میں خواتین کھلاڑیوں نے بڑی تعداد میں شرکت کرتے ہوئے اپنی صلاحیتوں، اعتماد اور کھیلوں سے محبت کا عملی مظاہرہ کیا۔
تقریب میں ایڈیشنل ڈپٹی کمشنر ریوینیو سنیہ صافی نے بطور مہمانِ خصوصی شرکت کی جبکہ پروگرام کی صدارت اسسٹنٹ کمشنر سوہاوہ غزالہ اصغر نے کی۔ انتظامیہ کی جانب سے بہترین انتظامات کیے گئے، جس کے باعث یہ ایونٹ سوہاوہ کی تاریخ میں خواتین کے لیے منعقد ہونے والا پہلا بڑا اسپورٹس میلہ ثابت ہوا۔
ویمن گیمز میں کرکٹ، رسہ کشی، ایتھلیٹکس، شطرنج اور مختلف فن گیمز کے دلچسپ مقابلے منعقد کیے گئے، جن میں خواتین کھلاڑیوں نے جوش و جذبے کے ساتھ حصہ لیا۔ ایڈیشنل ڈپٹی کمشنر ریوینیو سنیہ صافی اور اسسٹنٹ کمشنر غزالہ اصغر نے مختلف مقابلوں کا معائنہ کیا اور خواتین کی کارکردگی کو سراہتے ہوئے ان کے حوصلے اور اعتماد کی تعریف کی۔
اختتامی تقریب میں ڈپٹی کمشنر جہلم کے ویژن کے مطابق فاتح کھلاڑیوں میں ٹرافیاں اور انعامات تقسیم کیے گئے۔ اس موقع پر مقررین نے کہا کہ ویمن گیمز جیسے ایونٹس خواتین کو بااختیار بنانے، صحت مند معاشرے کی تشکیل اور مثبت سرگرمیوں کے فروغ میں اہم کردار ادا کرتے ہیں۔
انتظامیہ نے اس عزم کا اعادہ کیا کہ ڈپٹی کمشنر جہلم کی قیادت میں ضلع بھر میں خواتین کے لیے اس نوعیت کی تعمیری اور مثبت سرگرمیاں مستقبل میں بھی باقاعدگی سے منعقد کی جاتی رہیں گی۔
