جہلم: موجودہ ملکی صورتحال کے پیش نظر ضلعی انتظامیہ نے سول ڈیفنس کے نظام کو متحرک کرنے اور نوجوانوں کو اس میں شامل کرنے کے لیے جامع لائحہ عمل تشکیل دینے کا فیصلہ کر لیا ہے۔
اس ضمن میں ڈپٹی کمشنر جہلم سید محمد میثم عباس کی زیر صدارت محکمہ سول ڈیفنس اور امدادی اداروں کے افسران کا خصوصی اجلاس منعقد ہوا، جس میں ڈی پی او جہلم طارق عزیز سندھو سمیت ضلعی افسران نے شرکت کی۔
اجلاس میں تمام افسران نے اپنی تجاویز پیش کیں، جن کی روشنی میں ڈپٹی کمشنر نے ایک کمیٹی تشکیل دیتے ہوئے ہدایت کی کہ سول ڈیفنس کی تشکیل نو، نوجوانوں کی بھرتی اور تربیت کے لیے فوری عملی اقدامات کیے جائیں۔ ان کا کہنا تھا کہ سول ڈیفنس کو امن و جنگ دونوں ادوار میں فعال کردار ادا کرنا ہے، اس لیے اسے جدید تقاضوں سے ہم آہنگ کرنا وقت کی اہم ضرورت بن چکی ہے۔
اسی سلسلے میں ڈپٹی کمشنر سید محمد میثم عباس نے سول ڈیفنس دفتر کا دورہ بھی کیا، جہاں سول ڈیفنس آفیسر محمد اشفاق نے انہیں ادارے کی کارکردگی، آلات، گاڑیوں کی موجودہ حالت اور اہلکاروں کی تیاریوں پر تفصیلی بریفنگ دی۔ ڈپٹی کمشنر نے بم ڈسپوزل، آگ بجھانے کے آلات اور دیگر شعبہ جات کا معائنہ کرتے ہوئے اطمینان کا اظہار کیا۔
ڈپٹی کمشنر نے ہدایت کی کہ تمام اہلکار ہمہ وقت تیار رہیں اور تمام ضروری آلات کو فعال حالت میں رکھا جائے تاکہ کسی بھی ہنگامی صورتحال میں فوری ردعمل یقینی بنایا جا سکے۔
