جہلم: لاہور چیمبر آف کامرس کے زیرِ اہتمام پاکستان ٹریڈ باڈیز کانفرنس منعقد کی گئی، جس میں جہلم چیمبر آف کامرس اینڈ انڈسٹری (JCCI) کی نمائندگی صدر حاجی زاہد حسین بٹ نے کی جبکہ ان کے ہمراہ ڈپٹی سیکرٹری جنرل وقار احمد شیخ بھی موجود تھے۔
کانفرنس کے دوران ٹریڈ باڈیز ایکٹ میں مجوزہ ترمیم پر شدید احتجاج کیا گیا اور اسے ایک "کالا قانون” قرار دیا گیا۔
حاجی زاہد حسین بٹ نے اپنے خطاب میں کہا کہ تاجر برادری اس ترمیم کو مکمل طور پر مسترد کرتی ہے۔ جب بھی ملکی معیشت مستحکم ہونے لگتی ہے، بیوروکریسی ایسی پالیسیاں متعارف کروا دیتی ہے جو کاروباری طبقے کے لیے مشکلات پیدا کرتی ہیں۔
انہوں نے مزید کہا کہ گزشتہ چیمبر الیکشن دو سالہ مدت کے لیے منعقد کیے گئے تھے، جو ملکی معیشت اور تجارت کے استحکام کے لیے ایک مثبت اقدام تھا۔
حاجی زاہد حسین بٹ نے حکومت پر زور دیا کہ وہ ایسی پالیسیاں متعارف کرائے جو ملک کی معیشت اور تجارتی سرگرمیوں کو مستحکم کرنے میں معاون ثابت ہوں۔ انہوں نے خبردار کیا کہ اگر حکومت نے اس "کالے قانون” کو واپس نہ لیا تو تاجر تنظیمیں ہر ممکن اقدام اٹھائیں گی، یہاں تک کہ قانونی چارہ جوئی سے بھی گریز نہیں کیا جائے گا۔
کانفرنس میں مختلف چیمبرز کے نمائندگان نے بھی خطاب کیا اور اس ترمیم کے خلاف اپنے تحفظات کا اظہار کیا۔ تاجر برادری نے حکومت سے مطالبہ کیا کہ وہ فوری طور پر اس قانون کو واپس لے تاکہ کاروباری برادری کو مزید مشکلات سے بچایا جا سکے۔
