پنڈدادنخان: معروف سماجی شخصیت انجینئر ملک وارث اعوان نے صوبائی حلقہ پی پی 26 سے کاغذات نامزدگی جمع کروا دیئے۔
کاغذات نامزدگی جمع کروانے کے بعد انہوں نے میڈیا سے گفتگو کرتے ہوئے کہا کہ ہر گزرتے دن کے ساتھ انتخابات کا انعقاد یقینی ہوتا جارہا ہے، 8 فروری کو پاکستان کی عوام اپنی نئی قومی و صوبائی اسمبلیاں منتخب کریں گے، الیکشن اب قومی فریضہ بنتا جا رہا ہے یہ پاکستان میں رہنے والوں کے بچوں کے مستقبل کا سوال ہے۔
ملک وارث اعوان نے کہا کہ جو عزتیں تحصیل پنڈدادنخان کی عوام نے مجھے دیں وہ میری زندگی کا قیمتی اثاثہ ہیں، ہم نے پہلے بھی علاقے کے مسائل کو اجاگر کیا اور اس کے حل کے لئے آواز بلند کرتے رہے یہ سلسلہ آئندہ بھی جاری رہے گا۔ تحصیل پنڈدادنخان کے غیور ، نڈر ، باغیرت ، دلیر عوام نے اگر میرے اوپر اعتماد کیا اور مجھے منتخب کرکے اسمبلی میں بھجوایا تو میں علاقہ کی محرومیوں کو دور کرنے کی بھرپور کوشش کروں گا۔
انہوں نے کہا کہ تحصیل پنڈدادنخان اور تحصیل جہلم کے نوجوان پہلے بھی میرے ساتھ بے پناہ محبت کرتے ہیں مجھے اللہ پاک پر قوی یقین ہے کہ حلقہ پی پی 26 کے عوام مجھے ضرور منتخب کرے گی۔ نوجوان میرے بازو بنیں تاکہ علاقے سے محرومیوں کا خاتمہ کیاجائے۔
