پنڈدادنخان میں آوارہ کتوں کو مارنے کیلئے ایکسپائر زہر کے استعمال کا انکشاف، کتے زہر کھا کر ڈکاریں مارتے ہوئے شہر کے مصروف ترین علاقے شالیمار چوک اور چوک محمدیہ کے قریب مٹر گشت کرتے ہوئے دیکھائی دیتے ہیں۔
تفصیلات کے مطابق چند روز قبل جہلم پنڈدادنخان کے نواحی علاقوں میں تین بچے اور گزشتہ روز سوڈی گجر میں دو سالہ بچے کو کتوں نے کاٹ کر زخمی کر دیا تھا۔ ان واقعات کے بعد ڈپٹی کمشنر جہلم میثم عباس کی طرف سے فوری نوٹس لیا گیا تھا اور متعلقہ حکام کو تمام تر کارروائی فوری طور پر کرنے کے آرڈر جاری کیے تھے۔
میونسپل کمیٹی پنڈدادنخان کی جانب سے بھی کتوں کو مارنے کے لیے زہر دے کر فوٹو بنائے گئے لیکن ایک دو کے علاوہ بقیہ زہر دیے گئے کتے مر نہیں پائے بلکہ جن کتوں کو زہر دیا گیا وہ انسانوں اور جانوروں کے لیے پہلے سے زیادہ خطرناک ہو گئے ہیں۔
میڈیکل فیلڈ سے تعلق رکھنے والے افراد کا کہنا ہے کہ ایسے کتوں سے جن کو زہر دیا گیا اور وہ مر نہ پائے ہوں انسانوں کے ساتھ ساتھ پالتو جانوروں کو بھی بچانا چاہیے کیونکہ ان کے کاٹنے سے نقصان کا زیادہ اندیشہ پیدا ہو گیا ہے۔
