جہلم: ڈپٹی کمشنر جہلم میثم عباس نے یونین کونسل گرمالہ کا دورہ کیا اور ستھرا پنجاب مہم کے تحت صفائی کے انتظامات کا جائزہ لیتے ہوئے صورتحال کو مزید بہتر بنانے کی ہدایت دی۔
ڈپٹی کمشنر نے دورے کے دوران سیکرٹری یونین کونسل سے صفائی کے انتظامات اور دیگر عوامی سہولیات کے حوالے سے تفصیلی معلومات حاصل کیں۔ اس موقع پر ان کے ہمراہ ایڈمنسٹریٹر بلدیہ صباء سحر، اسسٹنٹ ڈائریکٹر لوکل گورنمنٹ میڈم مریم، اسسٹنٹ کمشنر جہلم شمس الرحمٰن اور دیگر متعلقہ افسران بھی موجود تھے۔
ڈپٹی کمشنر میثم عباس نے سیکرٹری یونین کونسل کو ہدایت کی کہ یونین کونسل میں صفائی کے معیار کو مزید بہتر بنایا جائے اور عوام کو صاف اور صحت مند ماحول فراہم کرنے کے لیے اقدامات تیز کیے جائیں۔ انہوں نے یونین کونسل کے انتظامی معاملات، خصوصاً شہریوں کے ریکارڈ کو درست اور منظم طریقے سے مرتب کرنے پر بھی زور دیا۔
ڈپٹی کمشنر نے کہا کہ عوامی سہولیات کی بہتری اور شہریوں کو مسائل سے نجات دلانے کے لیے تمام ممکنہ وسائل بروئے کار لائے جائیں۔ انہوں نے افسران کو ہدایت دی کہ ستھرا پنجاب مہم کو کامیاب بنانے کے لیے شہریوں کو بھی اس مہم کا حصہ بنایا جائے اور انہیں صفائی کی اہمیت سے آگاہ کیا جائے۔
