جہلم: سید حسن مجتبیٰ نے کہا ہے کہ آئی جی جیل خانہ جات میاں فاروق نذیر کی ہدایات پر عیدالاضحی کے موقع پر قیدیوں کے لیے خصوصی اقدامات کیے گئے تھے، جن میں اہل خانہ سے ملاقات، قربانی کے گوشت کی فراہمی اور عید کے دو ایام کے لیے خاص ناشتہ و کھانوں کا مینیو شامل تھا۔
سپرنٹنڈنٹ ڈسٹرکٹ جیل جہلم سید حسن مجتبیٰ نے بتایا کہ مخیر حضرات اور سماجی شخصیات کے تعاون سے قیدیوں کے لیے قربانی کا گوشت ڈسٹرکٹ جیل پہنچایا گیا، جس سے جیل میں عید کا ماحول پیدا ہوا۔ قیدیوں کو عید کی خوشیوں میں شامل کرنے کے لیے ان کے اہل خانہ کو ملاقات کی اجازت دی گئی تاکہ وہ اپنے پیاروں سے مل کر عید کا دن گزار سکیں۔
اس موقع پر ڈپٹی سپرنٹنڈنٹ ڈسٹرکٹ جیل سمیت دیگر افسران بھی موجود تھے، جو تمام انتظامات کی نگرانی کر رہے تھے۔
سپرنٹنڈنٹ سید حسن مجتبیٰ نے کہا کہ قیدی بھی انسان ہیں اور ان کے بنیادی انسانی حقوق کا خیال رکھنا ہماری ذمہ داری ہے۔ عید کے موقع پر ان کے چہروں پر خوشی لانا ہمارے لیے باعث اطمینان تھا۔
انہوں نے مزید کہا کہ اللہ تعالیٰ کی خوشنودی کے لیے مخلوقِ خدا کی خدمت ہماری اولین ترجیح ہے اور ہم ہر ممکن کوشش کرتے ہیں کہ قیدیوں کو بہتر سہولیات میسر آئیں تاکہ وہ اپنی اصلاح کی طرف راغب ہوں اور معاشرے کے مفید شہری بن سکیں۔
