پنڈدادنخان کے نواحی علاقے جھگیاں میں مویشیوں میں لمپی اسکن بیماری کے کیسز سامنے آنے کی اطلاعات پر محکمہ لائیو اسٹاک کی ٹیمیں متحرک ہو گئی ہیں اور متاثرہ علاقے میں حفاظتی و تدارکی اقدامات شروع کر دیے گئے ہیں۔
تفصیلات کے مطابق جہلم کی تحصیل پنڈدادنخان کے علاقے جھگیاں میں متعدد جانوروں کے جسم پر گانٹھیں اور زخم ظاہر ہونے کے بعد مویشی پال افراد نے محکمہ لائیو اسٹاک سے فوری کارروائی کا مطالبہ کیا تھا۔ اطلاع ملنے پر محکمہ لائیو اسٹاک کی ٹیموں نے متاثرہ علاقے کا دورہ کیا اور بیماری میں مبتلا جانوروں کا معائنہ کرکے ان کے علاج معالجے کے لیے ضروری اقدامات کیے۔
محکمہ لائیو اسٹاک کی ٹیموں نے متاثرہ جانوروں اور ان کے اطراف میں جراثیم کش اسپرے بھی کیا، جبکہ مویشی پال حضرات کو جانوروں کی صحت کے حوالے سے ضروری احتیاطی تدابیر اختیار کرنے کی ہدایت کی گئی۔
محکمہ کے عملے نے مویشی پال افراد پر زور دیا کہ بیمار جانوروں کو صحت مند جانوروں سے الگ رکھا جائے تاکہ بیماری کے مزید پھیلاؤ کے امکانات کو کم کیا جا سکے۔ جانوروں کی باقاعدگی سے نگرانی کرنے اور کسی بھی مشتبہ علامات کی صورت میں فوری طور پر محکمہ لائیو اسٹاک کو اطلاع دینے کی بھی ہدایت کی گئی۔
مقامی مویشی پال افراد نے محکمہ لائیو اسٹاک کی جانب سے بروقت کارروائی پر اطمینان کا اظہار کرتے ہوئے مطالبہ کیا کہ بیماری کے مزید پھیلاؤ کی روک تھام کے لیے علاقے میں مسلسل سرویلنس، اسپرے اور ضروری طبی اقدامات کا سلسلہ جاری رکھا جائے۔
اہل علاقہ کا کہنا ہے کہ اگر بروقت حفاظتی اقدامات نہ کیے گئے تو بیماری دیگر علاقوں میں بھی پھیل سکتی ہے، جس سے مویشی پال افراد کو بھاری مالی نقصان کا سامنا کرنا پڑ سکتا ہے۔
شہریوں نے ضلعی و تحصیل انتظامیہ اور محکمہ لائیو اسٹاک کے اعلیٰ حکام سے مطالبہ کیا ہے کہ جھگیاں اور گردونواح میں مویشیوں کی باقاعدہ نگرانی، تشخیص، علاج اور بیماری سے بچاؤ کے لیے مؤثر اقدامات کا سلسلہ جاری رکھا جائے تاکہ لمپی اسکن بیماری کو مزید پھیلنے سے روکا جا سکے۔
