جہلم: ضلع جہلم میں ماہِ ربیع الاول کی مناسبت سے کالجز میں محافل میلاد ﷺ عقیدت و احترام کے ساتھ منعقد کی جا رہی ہیں۔
گورنمنٹ پوسٹ گریجویٹ کالج ٹاہلیانوالہ میں منعقدہ محفل میلاد میں طلباء نے تلاوتِ کلام پاک، نعتِ رسول مقبول ﷺ اور آقا ﷺ کی شانِ اقدس میں نعتیہ اشعار پیش کیے۔
اس موقع پر ڈپٹی ڈائریکٹر کالجز پروفیسر حماد رضا اعوان نے خطاب کرتے ہوئے کہا کہ میلاد پاک ﷺ کو منانا ہر صاحب ایمان کے لیے باعثِ برکت و رحمت ہے۔ ماہِ ربیع الاول کو بھرپور عقیدت و احترام کے ساتھ منانے کا مقصد نوجوان نسل کو سیرت النبی ﷺ سے روشناس کرانا اور اُنہیں آپ ﷺ کی تعلیمات کے مطابق زندگی گزارنے کی ترغیب دینا ہے۔
تقریب میں طلباء کے درمیان تقریری مقابلے اور پینٹنگ مقابلے بھی منعقد ہوئے، جن میں نمایاں کارکردگی دکھانے والے طلباء میں انعامات اور سرٹیفکیٹس تقسیم کیے گئے۔
شرکائے محفل نے نعتیہ کلام انتہائی عقیدت و احترام سے پیش کیا جس کو حاضرین نے بے حد سراہا، جبکہ آخر میں آقا ﷺ کی ذاتِ بابرکات پر درود و سلام کا نذرانہ پیش کیا گیا۔
