جہلم: پنجاب حکومت نے والدین اور طلبہ کو ریلیف فراہم کرنے کے لیے اہم اقدام اٹھاتے ہوئے نصابی کتب، یونیفارم اور دیگر تعلیمی ساز و سامان کی مخصوص دکانوں سے خریداری پر سخت پابندی عائد کر دی ہے۔
محکمہ اسکول ایجوکیشن پنجاب نے نجی اسکولوں کی جانب سے والدین کو مخصوص پوائنٹس یا وینڈرز سے خریداری پر مجبور کرنے کے عمل کے خلاف سخت کارروائیوں کا حتمی فیصلہ کر لیا ہے۔
محکمہ اسکول ایجوکیشن کی جانب سے جاری نوٹس کے مطابق کوئی بھی نجی تعلیمی ادارہ والدین کو کسی مخصوص دکان، وینڈر یا سروس سے خریداری پر مجبور نہیں کر سکتا۔ مخصوص دکانوں سے نصابی کتب، یونیفارم یا دیگر اشیاء خریدنے پر مجبور کرنا پنجاب پرائیویٹ ایجوکیشنل انسٹی ٹیوشنز آرڈیننس کی صریح خلاف ورزی ہے۔
حکام کا کہنا ہے کہ اس حکم کی خلاف ورزی کرنے والے نجی اسکول مالکان کے خلاف بلا تفریق قانونی کارروائی عمل میں لائی جائے گی۔ محکمہ اسکول ایجوکیشن کے مطابق والدین اور طلبہ کو اپنے حقوق کے تحفظ کے لیے مکمل قانونی سہولت فراہم کی جائے گی۔
مزید بتایا گیا ہے کہ غیر قانونی اقدامات یا دباؤ سے متعلق شکایات والدین متعلقہ ضلعی ایجوکیشن اتھارٹی یا وزیراعلیٰ پنجاب شکایت سیل میں درج کرا سکتے ہیں۔ حکام نے واضح کیا ہے کہ قانون موجود ہے اور اس پر سختی سے عملدرآمد یقینی بنایا جائے گا تاکہ والدین کو غیر ضروری مالی بوجھ سے بچایا جا سکے۔
