جہلم: آئی جی پنجاب پولیس ڈاکٹر عثمان انور کے ویژن، ایڈیشنل آئی جی ٹریفک پنجاب مرزا فاران بیگ کے احکامات اور ڈسٹرکٹ پولیس آفیسر جہلم ناصر محمود باجوہ کی زیرِ نگرانی ڈی ایس پی ٹریفک جہلم رضا حسنین اعوان نے جی ٹی ایس چوک جہلم میں کھلی کچہری کا انعقاد کیا جس میں عوام الناس کے مسائل سنے اور موقع پر احکامات جاری کیے۔
اس موقع پر ڈی ایس پی ٹریفک جہلم رضا حسنین اعوان کا کہنا تھا کہ شہری اپنے کم عمر بچوں کو سواری چلانے کی اجازت نہ دیں، موٹر سائیکل سوار ہیلمٹ کا استعمال کریں، سائیڈ ویو شیشے لگوائیں۔ ون ویلنگ ایک جان لیوا کھیل ہے اس سے اجتناب کریں، رانگ پارکنگ اور تجاوزات سے پرہیز کریں اس سے ٹریفک کا بہاؤ متاثر ہوتا ہے۔
انہوں نے کہا کہ 14اگست یوم آزادی کی آمد ہے، اس موقع پر اپنے پیاروں پر خصوصی توجہ دی جائے کہ اس موقع پر ون ویلنگ اور سٹنٹ نہ کریں، یہ ایک جان لیوا کھیل ہے۔ لائسنس برانچ میرٹ پر کام کر رہی ہے، اپنا اپنے بچوں کا لائسنس لازمی بنوائیں۔
ڈی ایس پی ٹریفک جہلم رضا حسنین اعوان نے کہا کہ کوئی ٹریفک اہلکار یا ٹاؤٹ رشوت طلب کرے تو میرے آفس کے دروازے عوام کے لیے کھلے ہیں، ہر قسم کی شکایات پر سخت محکمانہ کارروائی عمل میں لائی جائے گی۔ ان کا کہنا تھا کہ آفس میں روزانہ کی بنیاد پر دن 11 بجے سے 12بجے تک عوام کیلئے کھلی کچہری کا انعقاد کیا جاتا ہے ۔
