دینہ: چوہدری حسن عدیل نے کہا کہ عمران خان عوام کے دلوں پر راج کرنے والے لیڈر ہیں، ہمیں فخر ہے کہ ہم عمران خان کے سپاہی ہیں۔ جہلم میں عوامی کام نہ ہونا لمحہ فکریہ ہے، عوامی نمائندوں کو عوام کے درمیان ہونا چاہئے نہ کہ لاہور اور اسلام آباد کی نمائندگی کریں۔
پاکستان تحریک انصاف ضلع جہلم کے رہنما و سابق امیدوار برائے قومی اسمبلی حلقہ این اے 60 چوہدری حسن عدیل ثقلین نے دینہ پریس کلب کے وفد سید توقیر آصف شاہ، حاجی اظہر چوہدری، چیف ایڈیٹر جہلم اپڈیٹس عادل چوہدری اور عرفان محبوب سے ایک تقریب میں بات چیت کرتے ہوئے کہا کہ جہلم میں ترقیاتی کام نہ ہونے سے عوام شدید پریشان ہیں، فارم 47 والے سلیکٹڈ نمائندے خدا کا خوف کریں جب اللہ کی پکڑ ہو گی تو کون ان کو بچائے گا۔
انہوں نے کہا کہ ہمارا مینڈیٹ چرانے والے ایوانوں میں بیٹھ گئے ہیں، ہماری اعلی عدلیہ آزاد ہے اور ہمیں امید ہے کہ جلد ہی فارم 47 والوں کے چہرے بے نقاب ہوں گے۔
چوہدری حسن عدیل نے کہا کہ الیکشن کے دوران ضلع جہلم کی عوام سے کئے گئے وعدے وفا نہیں کئے جا رہے، عوام کی حالت دیکھ کر دکھ ہوتا ہے، مہنگائی آسمان کو چھو رہی ہے۔ سلیکٹڈ نمائندے کم از کم عوام کے مسائل تو حل کریں۔
انہوں نے کہا کہ میرا اپنے اہلیان جہلم اور خصوصاً نوجوانوں کے لئے پیغام ہے کہ کفر کا نظام تو چل سکتا ہے مگر ظلم کا نظام نہیں چل سکے گا۔ نوجوان ہمت نہ ہاریں، جلد ہمارے قائد عمران خان ہمارے درمیان ہوں گے اور انکی قیادت میں ملک میں خوشحالی کا دور دورہ ہو گا۔
اس موقع پر چوہدری محمد ضمیر، راؤ صدیق اور ارغمان مانی نے کہا کہ ملکی تعمیر وترقی میں میڈیا کا اہم کردار ہوتا ہے۔
