جہلم پولیس نے محرم کے حوالے سے مربوط سیکیورٹی پلان پر عملدرآمد کا آغاز کر دیا۔
ڈی پی او جہلم ناصر محمود باجوہ نے بتایا کہ یکم محرم الحرام سے دس محرم الحرام تک 121جلوس اور673 مجالس کے لیے فول پروف سیکیورٹی انتظامات کو حتمی شکل دے دی گئی۔ ضلع جہلم میں اے کیٹیگری کے 10 بی کیٹیگری کے 7 اور سی کیٹیگری104 جلوس نکالے جائیں گے۔ اسی طرح بی کیٹیگری 21 اور سی کیٹیگری 652مجالس منعقد ہوں گی۔
انہوں نے بتایا کہ جلوس اور مجالس کی مانیٹرنگ کے لئے الگ سے CCTV کیمرہ نصب کر دیے گئے ہیں۔ محرم الحرام کی سیکیورٹی پر 800 سےزائد پولیس افسران و اہلکاران کے علاوہ انتظامیہ مجالس و جلوس پر وولینٹئیرز بھی ڈیوٹی سر انجام دیں گے۔
ڈسٹرکٹ پولیس آفیسر جہلم نے بتایا کہ سخت سیکیورٹی انتظامات کو مدِ نظر رکھتے ہوئے اہم مقامات پر پولیس کے سنائیپر تعینات کئے گئے ہیں۔ جلوس کے راستے میں آنے والی گلیوں اور بازاروں کو خار دار تاروں سے بند کر دیا جائے گا۔
انہوں نے بتایا کہ امن و امان کو برقرار رکھنے کے لئے الگ سے ایلیٹ اورQRFکے مسلح دستے بھی شہر بھر میں گشت کریں گے۔ ٹریفک کو رواں دواں رکھنے اور ٹریفک پرابلم نہ ہو الگ سے ٹریفک ڈیوٹی لگا دی گئی ہے۔
ڈی پی او جہلم ناصر محمود باجوہ نے بتایا کہ محرم الحرام کے دوران ڈیوٹی میں کسی قسم کی سستی، موبائل فون کا استعمال اور کوتاہی ہرگز برداشت نہیں کی جائے گی۔ محرم الحرام کے خاص آیام میں شرانگیزی پھیلانے والوں اور مشکوک اشخاص کی کڑی نگرانی کی جائے گی۔
ڈسٹرکٹ پولیس آفیسر جہلم ناصر محمود باجوہ نے بتایا کہ فرقہ وارانہ ہم آہنگی کے لیے نفرت آمیز تقاریر، وال چاکنگ، لاؤڈ اسپیکر اور اسلحہ کی نمائش کرنے والوں کے خلاف سختی سے عملدرآمد کروایا جائے گا۔ مکمل تلاشی لینے کے بعد ہی مجالس اور جلوس میں داخلے کی اجازت دی جائے گی۔
انہوں نے مزید بتایا کہ تمام تر پروگرامز کی مانیٹرنگ کے لئے کنٹرول روم قائم کر دیا گیا۔ جہلم پولیس عوام کے جان و مال اور عزت و آبرو کی حفاظت اور جرائم کے خاتمہ کے لیے ہمہ وقت مصروف عمل ہے۔
