جہلم: محرم الحرام کے دوران امن و امان کی صورتحال کا جائزہ لینے کے لیے سیکٹر کمانڈر بریگیڈیئر غضنفر تارڑ نے ڈی پی او جہلم طارق عزیز سندھو سے ان کے دفتر میں اہم ملاقات کی۔ اس موقع پر ضلع میں محرم الحرام کے حوالے سے سیکیورٹی انتظامات پر تفصیلی تبادلہ خیال کیا گیا۔
بریگیڈیئر غضنفر تارڑ نے ڈی پی او طارق عزیز سندھو کے ہمراہ سیف سٹی جہلم کا بھی دورہ کیا، جہاں انہیں جدید سیکیورٹی مانیٹرنگ سسٹم، نگرانی کے کیمروں اور دیگر سہولیات سے متعلق بریفنگ دی گئی۔
سیکٹر کمانڈر نے محرم الحرام کے دوران پولیس کی تیاریوں اور سیکیورٹی اقدامات کو سراہتے ہوئے مکمل تعاون کی یقین دہانی کرائی۔ ان کا کہنا تھا کہ امن و امان کو یقینی بنانے کے لیے تمام فورسز ہمہ وقت الرٹ ہیں اور کسی بھی ناخوشگوار واقعہ سے نمٹنے کے لیے مکمل حکمت عملی تیار ہے۔
ڈی پی او جہلم طارق عزیز سندھو نے بتایا کہ شہریوں کی جان و مال کا تحفظ اولین ترجیح ہے، محرم الحرام کے تمام جلوسوں اور مجالس کی سیکیورٹی کے فول پروف انتظامات مکمل کر لیے گئے ہیں۔ پولیس فورس، رینجرز اور دیگر قانون نافذ کرنے والے ادارے مکمل طور پر متحرک ہیں تاکہ ضلع بھر میں قیامِ امن کو یقینی بنایا جا سکے۔
