جہلم: فلم، ریڈیو اور ٹی وی ڈراموں کی نامور اداکارہ عطیہ شرف 83 برس کی عمر میں انتقال کر گئیں۔
وہ گزشتہ چھ ماہ سے گردے کے عارضے میں مبتلا تھیں۔ خاندانی ذرائع کے مطابق مرحومہ کی طبیعت گزشتہ کچھ دنوں سے زیادہ ناساز تھی اور وہ زیر علاج تھیں۔
عطیہ شرف پاکستان کی ڈرامہ اور فلم انڈسٹری میں ایک معتبر نام تھیں، جنہوں نے اپنے فن کے ذریعے ناظرین کے دل جیتے۔ وہ مرحوم اداکار خیام سرحدی کی اہلیہ تھیں اور ان کی فنکارانہ خدمات کو ہمیشہ یاد رکھا جائے گا۔
مرحومہ کی نماز جنازہ آج دن گیارہ بجے اسلامیہ سکول جہلم کے گراؤنڈ میں ادا کی جائے گی، جس میں عزیز و اقارب، دوست احباب اور شوبز انڈسٹری سے وابستہ شخصیات کی بڑی تعداد کی شرکت متوقع ہے۔
