جہلم: چوک گنبد والی مسجد اور سول لائن روڈ پر تجاوزات کے خلاف کیے جانے والے آپریشن کے باوجود ریڑھیوں اور لوڈر رکشوں کی بھرمار بدستور برقرار ہے۔
حکومت پنجاب کی ہدایات پر میونسپل کمیٹی کے شعبہ انکروچمنٹ نے مقامی پولیس کے ہمراہ ان علاقوں میں تجاوزات کے خاتمے کے لیے آپریشن کیا تھا، لیکن ماہِ رمضان کی آمد کے ساتھ ہی دوبارہ غیر قانونی طور پر ریڑھیاں اور لوڈر رکشے سڑکوں پر کھڑے ہونے لگے ہیں، جس سے ٹریفک کی روانی متاثر ہو رہی ہے اور شہریوں کو شدید مشکلات کا سامنا ہے۔
تجاوزات مافیا کی دوبارہ سرگرمیوں نے گزشتہ ماہ ہونے والے آپریشن کو مذاق بنا کر رکھ دیا ہے جو میونسپل کمیٹی کے شعبہ انکروچمنٹ کی کارکردگی پر ایک بڑا سوالیہ نشان ہے۔
شہریوں کا کہنا ہے کہ ہر بار آپریشن کے بعد چند روز کے لیے تجاوزات ختم ہو جاتی ہیں، لیکن انتظامیہ کی غفلت کے باعث دوبارہ قبضہ مافیا متحرک ہو جاتا ہے اور عوامی راستوں پر ناجائز تجاوزات قائم کر لیتا ہے۔
اس صورت حال پر شہریوں نے سخت برہمی کا اظہار کرتے ہوئے ڈپٹی کمشنر جہلم سے مطالبہ کیا ہے کہ وہ فوری طور پر اس کا نوٹس لیں اور تجاوزات دوبارہ قائم کرنے والوں کے خلاف سخت کارروائی عمل میں لائی جائے تاکہ سڑکوں کو مستقل طور پر تجاوزات سے پاک رکھا جا سکے اور عوام کو درپیش مشکلات کا خاتمہ ممکن ہو۔
