جہلم: ڈپٹی کمشنر جہلم میر رضا اوزگن کی ہدایت پر اسسٹنٹ کمشنر جہلم عبد السمیع شیخ نے تحصیل جہلم کے مختلف علاقوں میں ڈسٹرکٹ انسپکشن ٹیم (DIT) کے ہمراہ اسپاٹ چیکنگ کی۔
اس دورے کا بنیادی مقصد ستھرا پنجاب مہم، واسا کی جانب سے سیوریج کے جاری کاموں اور کھلے مین ہول کورز کی صورتحال کا تفصیلی جائزہ لینا تھا۔
معائنے کے دوران اسسٹنٹ کمشنر عبد السمیع شیخ نے شہر کے مختلف حصوں میں سیوریج لائنوں کی مرمت اور صفائی کے کاموں کے معیار کو چیک کیا۔
انہوں نے واسا حکام کو سخت ہدایات جاری کیں کہ جہاں بھی مین ہول کورز غائب یا خراب ہیں، انہیں فوری طور پر نصب اور درست کیا جائے تاکہ شہریوں کو کسی بھی ممکنہ حادثے سے محفوظ رکھا جا سکے۔ اس کے ساتھ ساتھ انہوں نے ستھرا پنجاب پروگرام کے تحت صفائی کے انتظامات کو مزید بہتر اور مؤثر بنانے پر بھی زور دیا۔
اس موقع پر ڈپٹی کمشنر جہلم میر رضا اوزگن کی ہدایات کا حوالہ دیتے ہوئے کہا گیا کہ عوامی مفاد کے منصوبوں اور بنیادی سہولیات کی فراہمی میں کسی قسم کی سستی یا کوتاہی ہرگز برداشت نہیں کی جائے گی۔
انہوں نے واضح کیا کہ ڈسٹرکٹ انسپکشن ٹیم کے ذریعے تمام فیلڈ سرگرمیوں کی کڑی نگرانی کی جا رہی ہے تاکہ واسا اور دیگر بلدیاتی ادارے شہریوں کو معیاری خدمات فراہم کریں اور جہلم شہر کا سیوریج نظام مکمل طور پر فعال اور محفوظ رہے۔
