اپنے 22 سالہ صحافتی کیرئیر میں پہلی بار ایسا ہوا کہ جب بھی لکھنے کو بیٹھا الفاظ نے ساتھ نہیں دیا، چند دن پہلے سوہاوہ شہر کی اچانک پاکستان بھر میں ایسی دھوم مچی کہ آنکھیں دھنگ رہ گئیں۔ متعدد بار قلم اٹھا کر لکھنے کی کوشش کی لیکن ہر بار نئی پوسٹ نے میرے لکھے کو بے معنی کر دیا ۔ ان دو تین ہفتوں میں کوئی دن ایسا نہیں گزرا جس میں کوئی نئی پوسٹ نہ لگتی ہو اور ہر پوسٹ پہلے کے مقابلے میں اس ایونٹ کے پیچھے چھپے چہروں کی محنت اور کرکٹ سے محبت کرنے والوں کی محبت کو نہ بڑھاتی ہو ۔
راقم اپنی پوری تحریر نام نہ بھی لکھے پھر بھی بچہ بچہ جان جائے گا کہ تحریر کس ایونٹ اور کن شخصیات کے متعلق ہے ۔ قارئین اکرام جیسا کہ میں نے پہلے لکھا کہ اپنے صحافتی کیرئیر میں پہلی بار ایسا ہوا ہے کہ لکھنے بیٹھا ہوں تو الفاظ بے معنی سے لگنے لگے ہیں۔ لکھنے لگتا ہوں کہ سوہاوہ پریمئر لیگ جس کی دھوم پورے پاکستان میں مچی ہوئی ہے تو یہ کوئی ایسی انوکھی بات نہیں لگتی کہ جس کا کسی کو علم نہ ہو۔
اگر یہ لکھوں کہ کسی نے دیکھنا ہو کہ دوستی کیا ہوتی ہے، اتحاد کیا ہوتا ہے، کمانڈ کیا ہوتی ہے، کھیل کیا ہوتا ہے، کرکٹ کیا ہوتی ہے، یارانہ کیا ہوتا ہے، انتظامات کیا ہوتے ہیں، مہمان نوازی کیا ہوتی ہے، عزت دینا کیا ہوتا ہے تو ان سب باتوں کا جواب صرف اور صرف ایک شخصیت میں نظر آئے گا۔
جس نے ثابت کر دیا کہ دوست کیا ہوتا ہے جس نے ثابت کیا کہ کمانڈ کرنا کس کو کہتے ہیں جس نے ثابت کیا کہ ٹیم ورک کیا ہوتا ہے جس نے سوہاوہ پرئمیر لیگ کی دھوم پاکستان بھر میں مچا کر بتا دیا کہ اگر آپ کے یار مخلص ہوں آپ کی کرکٹ سے محبت ہو آپ کرکٹ کو کھیل سمجھ کر میدان سجائیں تو وہ شخصیت سب کی زبان پر ایک ہی نام کے ساتھ ابھرتی ہے محمد فاروق بٹ جن کے گلدستے میں یٰسین چوہدری جیسے بہترین دوست شامل ہیں، جن کے گلدستے میں ایسے ایسے نایاب پھول ہیں کہ جنہوں نے اپنی ذات سے ہٹ کر صرف اور صرف کرکٹ کا دیوانہ ہونے کا ثبوت دیا۔
جنہوں نے ایک دوسرے کی عزت کو اپنی عزت سمجھا جنہوں نے ایونٹ کو نہ صرف کامیاب بلکہ اس ایونٹ میں اصل کرکٹ دکھانے کے لیے بھی دن رات ایک کیا۔پاکستان بھر سے تمام بہترین کھلاڑیوں کو سوہاوہ جیسے پسماندہ شہر میں جمع کیا گراؤنڈ کو ایسے سجایا کہ اس کی ویڈیو نے پورے پاکستان میں دھوم مچا دی ہر کوئی یہ کہنے پر مجبور ہو گیا کہ لگن شوق جذبے کے آگے وسائل کچھ معنی نہیں رکھتے۔
اس ایونٹ کے متعلق اب تک سینکڑوں پوسٹیں ہو چکی ہیں جس میں ایونٹ منتظمین کے نام ان کے ذمے لگائی جانے والی ڈیوٹیز اور ہر شخص کے کردار پر الگ الگ تحریر ہو چکا ہے۔ میری فیس بک وال سمیت واٹس ایپ گروپس میں فاروق بٹ کے خوبصورت گلدستے کے ہر ہر پھول کے متعلق لکھا ہوا موجود ہے۔
تحریر کا مقصد سوہاوہ پرئمیر لیگ سیزن 2 کے کامیاب انعقاد پر فاروق بٹ اور ان کی تمام ٹیم ہر ایک ایک شخص کو خراج تحسین پیش کرنا تھا۔ اہلیان تحصیل سوہاوہ کو خراج تحسین پیش کرنا تھا اور آخر میں اس بات پر اقرار کرنا کہ اتنا بڑا ایونٹ ہونے کے باوجود ہم تحصیل بھر کے صحافی اس کو اپنے نیشنل چینلز پر نہ لا سکے ہم ناکام رہے۔ میں نے نہ صحافت کا حق ادا کیا اور نہ اس شہر کے باسی ہونے کا کیونکہ یہ مجھ پر فرض تھا کہ میں اس ایونٹ کی کامیابی پر اپنے طور پر ضرور کوریج کرتا۔
بہرحال یہ ایونٹ کسی احسن وحید کی کوریج کا محتاج نہ تھا، اس ایونٹ نے خود اپنی کامیابی کو کامیابی سے ثابت کیا۔ آخر میں دعا گو ہوں کہ اللہ پاک فاروق بٹ ان کے دوستوں عزیزوں شاگردوں کی اس کرکٹ محبت کو سلامت رکھے۔ گراؤنڈ آباد کرنے اور ہسپتال ویران رکھنے کے لیے جو جدو جہد یہ کر رہے ہیں اللہ پاک ان کو اس کا اجر عطاء کرے ۔آمین
