جہلم شہر سمیت ضلع بھرکے سرکاری محکموں میں سیاسی مداخلت عروج پرپہنچ گئی ، ایک دفعہ پھر کماؤ پٹواریوں کی تعیناتیاں اور تبادلے شروع ہو گئے۔
یاد رہے چند سال قبل بھی کرپٹ پٹواریوں کی کرپشن منظر عام پر آنے کے بعد محکمہ مال نے پٹواریوں کو نوکریوں سے برخاست کیاتھا لیکن رواں سال حکومت کی تبدیلی کے بعد ایک مرتبہ پھر جہلم شہر سمیت ضلع بھر میں سیاسی مداخلت کی وجہ سے ضلع بھر کے غریب عوام کا خون چوسنے کے لیے دوبارہ بدعنوان کرپٹ پٹواریوں کی بحالی کے ساتھ ساتھ دوبارہ تعیناتیاں کرنے کی اطلاعات موصول ہورہی ہیں۔
کرپٹ پٹواریوں نے چند سال قبل غریب لوگوں کو اپنی جدی زمین سے لاوارث کر دیا اور سائلین سے انتقالات کی فیسیں وصول کرکے سرکاری خزانے میں جمع ہی نہیں کروائی تھیں جسکی وجہ سینکڑوں لوگوں کودوبارہ فیسیں جمع کروانا پڑیں اسطرح محکمہ مال نے کمال مہارت سے پٹواریوں کے خلاف اینٹی کرپشن میں مقدمات درج کروا کے اپنی جان چھڑا لی۔
پٹواری دیدہ دلیری کے ساتھ غریب عوام کولوٹ رہے ہیں ،پٹواریوں کی لوٹ مار کی وجہ سے بیشتر دفعہ شہر کے عوام نے احتجاج بھی کیا لیکن منتخب ممبران قومی و صوبائی اسمبلی پٹواریوں کے آگے سیسہ پلائی دیوار بن گئے۔ جس کیوجہ سے پٹواریوں نے سادہ لوح شہریوں کے ساتھ لوٹ مار جاری رکھی ۔
حکومت کی تبدیلی کے ساتھ ہی ایک کرپٹ بدعنوان پٹواری کو دوبارہ محکمہ مال میں بھرتی کرکے انتہائی اہم پٹوار حلقے میں بطور پٹواری تعینات کردیا گیا۔ جس نے درجنوں مالکان کی زمینوں کے ریکارڈ میں ردوبدل کرکے مالکان کو ایک سرساہی کا بھی مالک نہیں چھوڑا.
متاثرین کے احتجاج پر ڈپٹی کمشنر جہلم نے از خود نوٹس لیتے ہوئے پٹواری کو ایک مرتبہ پھر محکمہ مال سے برخاست کردیا ہے۔
شہری تنظیموں کے عمائدین کا کہنا ہے کہ محکمہ مال میں بھرتی ہونے والے پٹواریوں کا کریکٹر سرٹیفکیٹ اور متعلقہ تھانوں سے ریکارڈ چیک کروایا جائے تاکہ لوٹ مار کرنے والے افراد کو محکمہ مال میں بھرتی نہ کیا جائے تاکہ شہری بغیر رشوت کے اپنے جائز کام کروا سکیں۔
