پنڈدادنخان: پولیس نے جرائم پیشہ عناصر کے خلاف کارروائی کرتے ہوئے ڈکیتی کی متعدد وارداتوں میں ملوث "سعدی گینگ” کے دو ملزمان کو گرفتار کر لیا۔
ترجمان جہلم پولیس کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور ان کی ٹیم نے خفیہ اطلاعات اور پیشہ ورانہ مہارت کو بروئے کار لاتے ہوئے کامیاب کارروائی کی۔ کارروائی کے دوران ڈکیتی کی مختلف وارداتوں میں ملوث سعدی گینگ کے دو اہم ملزمان کو گرفتار کیا گیا۔
پولیس کے مطابق گرفتار ملزمان کے قبضے سے 26 ہزار روپے نقدی، ایک موبائل فون، پرس اور وارداتوں میں استعمال ہونے والے دو عدد پسٹل 30 بور بمعہ ایمونیشن برآمد کر لیے گئے ہیں۔ برآمد شدہ سامان کو قبضہ پولیس میں لے کر قانونی کارروائی کا آغاز کر دیا گیا ہے۔
ترجمان کے مطابق گرفتار ملزمان سے مزید تفتیش جاری ہے اور ان سے ڈکیتی کی دیگر وارداتوں کے بارے میں بھی معلومات حاصل کی جا رہی ہیں۔ پولیس کو توقع ہے کہ دورانِ تفتیش مزید اہم انکشافات سامنے آئیں گے اور گینگ کے دیگر ساتھیوں تک بھی رسائی حاصل کی جا سکے گی۔
پولیس حکام کا کہنا ہے کہ ملزمان کے خلاف ٹھوس شواہد اکٹھے کیے جا رہے ہیں اور مکمل تفتیش کے بعد انہیں چالان عدالت کیا جائے گا تاکہ قانون کے مطابق قرار واقعی سزا دلوائی جا سکے۔
ڈسٹرکٹ پولیس آفیسر جہلم شفیق احمد چوہدری نے اس موقع پر کہا کہ جرائم پیشہ عناصر کے خلاف بلاامتیاز کارروائیاں جاری رہیں گی اور شہریوں کے جان و مال کے تحفظ کو ہر صورت یقینی بنایا جائے گا۔ انہوں نے کہا کہ ضلع بھر میں امن و امان کے قیام اور جرائم کے خاتمے کے لیے جہلم پولیس پوری طرح متحرک ہے اور قانون شکن عناصر کے خلاف کارروائیوں کا سلسلہ بلا تعطل جاری رہے گا۔
ڈی پی او نے مزید کہا کہ عوام کے تعاون سے جرائم کی بیخ کنی کے لیے مؤثر اقدامات کیے جا رہے ہیں اور شہریوں کو محفوظ ماحول فراہم کرنا جہلم پولیس کی اولین ترجیح ہے۔
