جہلم: ڈپٹی کمشنر سید محمد میثم عباس نے کہا ہے کہ حکومت پنجاب کی ہدایت پر عوام کو ریلیف فراہم کرنے کے لیے لگائے گئے رمضان سہولت بازار میں شہریوں کی بڑی تعداد خریداری میں مصروف ہے۔ سہولت بازار میں خریداروں کے رش سے ثابت ہوتا ہے کہ عوام کو یہاں سستی اور معیاری اشیاء دستیاب ہیں۔
ڈپٹی کمشنر کے مطابق رمضان سہولت بازار میں آٹا، چینی، گھی، سبزیاں، پھل، کریانہ سمیت دیگر اشیاء عام مارکیٹ کی نسبت کم قیمت پر دستیاب ہیں۔ ضلعی انتظامیہ اس بات کو یقینی بنا رہی ہے کہ تمام اسٹالز پر اشیائے خوردونوش کی وافر مقدار میں دستیابی برقرار رہے تاکہ شہریوں کو خریداری کے دوران کسی قسم کی پریشانی کا سامنا نہ کرنا پڑے۔
انہوں نے مزید کہا کہ ضلعی انتظامیہ کے افسران روزانہ کی بنیاد پر رمضان سہولت بازار اور دیگر مارکیٹوں کا دورہ کر رہے ہیں، جہاں اشیائے خوردونوش کی مقررہ نرخوں پر دستیابی کا جائزہ لیا جا رہا ہے۔ مہنگے داموں فروخت کرنے اور مقررہ نرخوں کی خلاف ورزی کرنے والے دکانداروں اور تاجروں کے خلاف سخت کارروائیاں جاری ہیں۔
ڈپٹی کمشنر نے شہریوں سے اپیل کی کہ وہ ضلعی انتظامیہ کے ساتھ تعاون کریں تاکہ گراں فروشی کا خاتمہ ممکن بنایا جا سکے اور عوام کو سستی و معیاری اشیاء کی بلاتعطل فراہمی یقینی بنائی جا سکے۔
