جہلم: تھانہ سٹی پولیس نے کارروائی کرتے ہوئے لڑائی جھگڑے، جان سے مارنے کی دھمکیاں دینے اور ہوائی فائرنگ کے مقدمہ میں ملوث ملزم کو گرفتار کرکے اس کے قبضہ سے ناجائز اسلحہ برآمد کرلیا۔
ترجمان جہلم پولیس کے مطابق ایس ایچ او تھانہ سٹی اور ٹیم نے کارروائی کرتے ہوئے جان سے مارنے کی دھمکیاں دینے اور ہوائی فائرنگ کرنے کے مقدمہ میں ملوث ملزم کو حراست میں لے لیا۔ پولیس نے ملزم کے قبضہ سے پسٹل 30 بور معہ ایمونیشن بھی برآمد کیا ہے۔
پولیس کے مطابق گرفتار ملزم سے مزید تفتیش جاری ہے، جبکہ واقعے کے حوالے سے قانونی کارروائی عمل میں لائی جا رہی ہے۔
پولیس حکام کا کہنا ہے کہ ملزم کے خلاف ٹھوس شواہد اکٹھے کرکے اسے چالان عدالت کیا جائے گا اور قانون کے مطابق قرار واقعی سزا دلوائی جائے گی۔
ڈی پی او جہلم شفیق احمد چوہدری نے کہا کہ ضلع بھر میں جرائم پیشہ عناصر اور ناجائز اسلحہ رکھنے والوں کے خلاف بلاامتیاز کارروائیاں جاری ہیں۔ عوام کے جان و مال کے تحفظ اور امن و امان کے قیام کے لیے جہلم پولیس ہر ممکن اقدامات عمل میں لا رہی ہے۔
