جہلم: گورنر پنجاب سردار سلیم حیدر خان کا کہنا ہے کہ عوام کی سب سے بڑی مشکل بجلی کے بلوں میں بےتحاشہ اضافہ ہے ۔
گورنر پنجاب سردار سلیم حیدر خان نے ضلعی صدر پیپلزپارٹی چوہدری تسنیم ناصر اقبال کی دعوت پر جہلم کا دورہ کے دوران میڈیا سے گفتگو کرتےہوئے کہا کہ جب سے موجودہ حکومت قائم ہوئی ہے ہمیں مشکلات کا سامنا ہے، پیپلزپارٹی پچھلے کئی ماہ سے حکومت سے ملکر جدوجہد کر رہی ہے۔
گورنر پنجاب کا کہنا تھا کہ کسی کو ٹیکنوکریٹ کے خواب آ رہے ہیں تو ہم کچھ نہیں کر سکتے ہیں۔ ملک بار بار کے تجربات کا متحمل نہیں ہو سکتا، موجودہ سیٹ اپ پانچ سال تک چلے گا۔ ملک سیاسی طور پر مضبوط ہوگا تو ہی اس کی اکانومی مضبوط ہوگی ۔
انہوں نے کہا کہ بجلی کے بلوں میں کمی کےلیے صدر آصف علی زرداری بھی کوشاں ہیں۔ نوازشریف کا بجلی بلوں میں سبسڈی کا اعلان خوش آئند ہے ۔ موجود کولیشن حکومت ہے، پیپلزپارٹی، ن لیگ کی مکمل سپورٹ کر رہی ہے، ہم چاہتے ہیں موجود حکومت پانچ سال مکمل کرے ۔
گورنر پنجاب نے کہا کہ بجلی بلوں میں ریلیف مشکل حالات میں تازہ ہوا کا جھونکا ہے، آئی پی پیز پالیسی کو ریویو کرنا بہت ضروری ہے، پیپلزپارٹی چاہتی ہے آئی پی پیز معاہدوں کو ری وزٹ کیا جائے، ہمیں آئی پی پیز معاہدے رفتہ رفتہ ختم کرنے چاہئے۔
انہوں نے مزید کہا کہ سندھ گورنمنٹ تھرکول منصوبے کے تحت 250 میگاواٹ بجلی سسٹم میں شامل کر رہی ہے۔ تھرکول منصوبے کے تحت مرحلہ وار بجلی کی پیداوار میں اضافہ کیا جائے گا ۔ آئی پی پیز سے انحصار ختم ہونا چاہیے تاکہ عوام سکھ کا سانس لے سکے ۔
