جہلم: پٹرولیم مصنوعات کی قیمتوں میں کمی کے باوجود ضلع جہلم کے مسافر کرایوں میں کسی بھی قسم کے ریلیف سے محروم ہیں۔ سیکرٹری ریجنل ٹرانسپورٹ اتھارٹی کی عدم دلچسپی کے باعث ٹرانسپورٹرز نے کرایوں میں کوئی کمی نہیں کی، جس کے باعث شہری شدید پریشانی کا شکار ہیں۔
تفصیلات کے مطابق یکم مارچ کو وزیراعظم پاکستان کی جانب سے ڈیزل کی قیمتوں میں کمی کا اعلان کیا گیا، تاہم ماضی کی روایت برقرار رکھتے ہوئے اس مرتبہ بھی ریجنل ٹرانسپورٹ اتھارٹی کی جانب سے مسافروں کو ریلیف فراہم کرنے کے لیے کوئی نوٹیفکیشن جاری نہیں کیا گیا۔
اس غفلت کے باعث ضلع کے اندرون اور بین الاضلاعی ٹرانسپورٹ کے مالکان بدستور من مانی کرتے ہوئے پرانے کرایے وصول کر رہے ہیں، جبکہ گڈز ٹرانسپورٹ کے اڈہ مالکان بھی سابقہ نرخوں پر ہی کرایے لے رہے ہیں اور انہیں روکنے والا کوئی نہیں۔
شہریوں کا کہنا ہے کہ جب بھی پیٹرولیم مصنوعات کی قیمتوں میں اضافہ ہوتا ہے تو فوری طور پر کرایوں میں اضافہ کر دیا جاتا ہے، لیکن جب قیمتیں کم ہوتی ہیں تو عوام کو اس کا فائدہ نہیں پہنچتا۔
شہریوں نے چیئرمین ریجنل ٹرانسپورٹ اتھارٹی اور ڈپٹی کمشنر سے مطالبہ کیا ہے کہ وہ فوری طور پر اس مسئلے کا نوٹس لیتے ہوئے مسافروں کو ریلیف فراہم کریں اور کرایوں میں کمی کو یقینی بنائیں۔
