جہلم: ڈپٹی کمشنر میثم عباس نے کہا کہ رمضان سہولت بازار میں شہریوں کو تمام اشیاء کی فراہمی ارزاں نرخوں پر یقینی بنائی جا رہی ہے۔
ڈپٹی کمشنر جہلم میثم عباس نے رمضان سہولت بازار کا دورہ کرتے ہوئے شہریوں کو معیاری اور سستی اشیاء کی فراہمی کو یقینی بنانے کے عزم کا اظہار کیا۔ انہوں نے کہا کہ پنجاب حکومت کی ہدایت پر سہولت بازار قائم کیے گئے ہیں تاکہ شہریوں کو صاف ستھرے ماحول میں کم نرخوں پر اشیائے ضروریہ فراہم کی جا سکیں۔
ڈپٹی کمشنر نے مختلف کاؤنٹرز پر جا کر اشیاء کے نرخ اور معیار کا جائزہ لیا اور عملے کو ہدایت کی کہ وہ شہریوں کو بہترین سہولیات فراہم کریں۔ انہوں نے کہا کہ بازار میں آنے والے شہریوں کی شکایات کے ازالے کے لیے ایک خصوصی شکایتی سیل بھی قائم کیا گیا ہے، جہاں کسی بھی چیز کی عدم دستیابی، زائد قیمت وصولی یا ناقص معیار کی صورت میں شکایت درج کروائی جا سکتی ہے جس پر فوری ایکشن لیا جائے گا۔
اس موقع پر ڈپٹی کمشنر نے خریداری کے لیے آئے ہوئے شہریوں سے ملاقات بھی کی اور ان سے سہولت بازار میں فراہم کی جانے والی اشیاء کے معیار اور قیمتوں کے حوالے سے رائے لی۔ انہوں نے شہریوں کو یقین دلایا کہ ضلعی انتظامیہ مہنگائی کے خلاف بھرپور اقدامات کر رہی ہے اور ناجائز منافع خوری کو کسی صورت برداشت نہیں کیا جائے گا۔
انہوں نے متعلقہ افسران کو سختی سے ہدایت کی کہ وہ بازاروں میں اشیائے ضروریہ کی فراہمی کو مسلسل مانیٹر کریں اور عوام کو زیادہ سے زیادہ ریلیف فراہم کرنے کے لیے ہر ممکن اقدامات کریں۔
