جہلم: ضلعی انتظامیہ جہلم کے زیرِ اہتمام ماہِ ربیع الاول اور عید میلاد النبی ﷺ کی مناسبت سے خواتین کے لیے خصوصی محفلِ میلاد ﷺ کا انعقاد ڈسٹرکٹ کونسل ہال جہلم میں کیا گیا۔
بابرکت محفل میں خواتین نے حضور اکرم حضرت محمد ﷺ سے محبت و عقیدت کا اظہار کرتے ہوئے درود و سلام اور نعتیہ کلام کی روح پرور محفل میں شرکت کی۔
محفلِ میلاد ﷺ میں ایڈیشنل ڈپٹی کمشنر انفورسمنٹ سارہ امجد اور ایڈیشنل ڈپٹی کمشنر میونسپل سروسز علیزہ ریحان نے بطور مہمانانِ خصوصی شرکت کی۔ اس موقع پر سیرتِ طیبہ ﷺ کے مختلف پہلوؤں پر روشنی ڈالی گئی اور حضور اکرم ﷺ کی تعلیمات، حسنِ اخلاق، رحمت، محبت اور اخوت کے پیغام کو اجاگر کیا گیا۔
نعت خواں خواتین نے بارگاہِ رسالت ﷺ میں گلہائے عقیدت پیش کیے، جبکہ محفل کی روحانی فضا نے شرکاء کے جذباتِ محبتِ رسول ﷺ کو مزید تازہ کردیا۔
ڈی ای لٹریسی میمونہ انجم نے پروگرام کی میزبانی کے فرائض انجام دیے اور محفل کے مختلف مراحل کو خوش اسلوبی سے آگے بڑھایا۔
ضلعی انتظامیہ جہلم کی جانب سے ماہِ ربیع الاول کی مناسبت سے مذہبی تقریبات کا سلسلہ عقیدت و احترام کے ساتھ جاری ہے۔ انتظامیہ کے مطابق ان تقریبات کا مقصد سیرتِ النبی ﷺ کے آفاقی پیغام کو عام کرنا اور معاشرے میں محبت، امن، اخوت اور باہمی رواداری کے جذبات کو فروغ دینا ہے۔
