جہلم میں طوفانی بارش، دیواریں گرنے سے خاتون سمیت 3 افراد جاں بحق، چار افراد زخمی

جہلم میں طوفانی بارش کے باعث دیواریں گرنے سے خاتون سمیت تین افراد جاں بحق اور چار زخمی ہو گئے۔

تفصیلات کے مطابق جہلم کی تحصیل سوہاوہ میں شدید آندھی اور طوفان کے ساتھ موسلادھار بارش کے باعث مختلف علاقوں میں دیواریں گرنے کے تین واقعات پیش آئے، جن کے نتیجے میں خاتون سمیت تین افراد جاں بحق جبکہ بچے سمیت چار افراد زخمی ہوگئے۔

سوہاوہ کے محلہ شہیداں میں شدید آندھی اور بارش کے دوران چھت کی دیوار اچانک نیچے گزرنے والی لوڈر ٹرالی پر آگری، جس سے ٹرالی میں سوار 30 سالہ عامر اور 55 سالہ یوسف موقع پر ہی جاں بحق ہو گئے جبکہ 60 سالہ اخلاق اور 62 سالہ الیاس شدید زخمی ہو گئے۔

ریسکیو ون ون ٹو ٹو کی ٹیموں نے فوری کارروائی کرتے ہوئے لاشوں اور زخمیوں کو ملبے سے نکال کر تحصیل ہیڈ کوارٹر ہسپتال سوہاوہ منتقل کر دیا، جہاں زخمیوں میں سے ایک کی حالت تشویشناک ہے جسے راولپنڈی ہسپتال منتقل کر دیا گیا۔

دیوار گرنے کا دوسرا واقعہ سوہاوہ کے علاقے پڑی درویزہ میں پیش آیا، جس میں خاتون ریحانہ کوثر شدید زخمی ہوگئی جسے شدید زخمی حالت میں راولپنڈی ہسپتال منتقل کیا گیا لیکن وہ راستے میں ہی دم توڑ گئی۔

سوہاوہ میں دیوار گرنے کے تیسرے واقعے میں ایک بچہ اور نوجوان شدید زخمی ہو گئے۔ ریسکیو ٹیموں نے فوری موقع پر پہنچ کر تمام زخمیوں کو طبی امداد فراہم کرنے کے بعد اسپتال منتقل کر دیا۔