جہلم: ڈپٹی کمشنر جہلم میر رضا اوزگن کی زیر صدارت ڈسٹرکٹ ایمرجنسی بورڈ کا اہم اجلاس منعقد ہوا، جس میں مون سون بارشوں، منگلا ڈیم میں پانی کی موجودہ صورتحال، ممکنہ سیلابی خطرات اور حفاظتی انتظامات کا تفصیلی جائزہ لیا گیا۔
اجلاس میں ایڈیشنل ڈپٹی کمشنر (ریونیو)، ریسکیو 1122، این ڈی ایم اے اور دیگر متعلقہ محکموں کے افسران نے شرکت کی۔ اس موقع پر ڈپٹی کمشنر کو مون سون سیزن کے لیے کیے گئے انتظامات، امدادی سامان کی دستیابی، ہنگامی صورتحال سے نمٹنے کی تیاریوں اور منگلا ڈیم میں پانی کے بہاؤ سے متعلق تفصیلی بریفنگ دی گئی۔
اجلاس سے خطاب کرتے ہوئے ڈپٹی کمشنر میر رضا اوزگن نے تمام متعلقہ اداروں کو ہدایت کی کہ مون سون کے دوران کسی بھی ممکنہ ہنگامی صورتحال سے نمٹنے کے لیے تمام حفاظتی انتظامات بروقت مکمل کیے جائیں۔ انہوں نے کہا کہ دریاؤں، ندی نالوں اور نشیبی علاقوں کے قریب آباد آبادیوں کو مسلسل الرٹ رکھا جائے اور خطرے کی صورت میں متاثرہ افراد کو فوری طور پر محفوظ مقامات پر منتقل کرنے کے لیے تمام دستیاب وسائل بروئے کار لائے جائیں۔
انہوں نے مزید ہدایت کی کہ ممکنہ سیلاب سے متاثرہ افراد کے لیے قائم کیے جانے والے فلڈ ریلیف کیمپس میں ادویات، خوراک، پینے کے صاف پانی اور دیگر بنیادی سہولیات کی فراہمی ہر صورت یقینی بنائی جائے تاکہ متاثرہ شہریوں کو بروقت امداد فراہم کی جا سکے۔
ڈپٹی کمشنر نے اس بات پر زور دیا کہ عوام کے جان و مال کا تحفظ ضلعی انتظامیہ کی اولین ترجیح ہے۔ انہوں نے ضلع بھر میں قائم کنٹرول رومز کو چوبیس گھنٹے فعال رکھنے، تمام متعلقہ اداروں کے درمیان مؤثر رابطہ برقرار رکھنے اور کسی بھی ہنگامی صورتحال میں فوری اور مربوط کارروائی یقینی بنانے کی ہدایت کی۔
اجلاس میں اس عزم کا اظہار کیا گیا کہ مون سون سیزن کے دوران ضلعی انتظامیہ اور تمام متعلقہ ادارے مکمل ہم آہنگی کے ساتھ فرائض انجام دیں گے تاکہ کسی بھی ممکنہ قدرتی آفت کے اثرات کو کم سے کم کیا جا سکے اور شہریوں کے جان و مال کا ہر ممکن تحفظ یقینی بنایا جا سکے۔
